نصائح مهمة لمكياج العيون

نصائح مهمة لمكياج العيون




نصائح سريعة

قبل ما أتكلم عن ماكياج العين عايزة أقولكم على شوية نصائح سريعة...



-1-
احرصي في فترة الصبح على إن ماكياج عينك يكون هادي بسيط وخصوصا لو كنتي نازلة رايحة الشغل أو الجامعة فمثلا مفيش داعي إنك تحطي قلم كحل أسود تقيل أو ماسكرا قوية أو تحطي ألوان آي شادو صارخة وجامدة الصبح.

-2-
خلي بالك إن الناس ممكن تعرف حالتك النفسية وأنت بتفكري في إيه من نظرتك للأشياء أو الأشخاص علشان كده كوني دايما حذرة لأن عينك هي مرايتك النفسية قدام الناس وده لأن نظرة العين هي اللي بتقول أنت مين؟! وبتفكري في إيه؟!

-3-
للأسف كل البنات بتهمل منطقة العين وبتنسى تهتم بيها نهائيا, وده بيؤدي لظهور التجاعيد مبكرا بداية من سن 26 علشان كده بانصحك إنك تستخدمي مزيل ماكياج ضد الحساسية في إزالة ماكياج العين وده بيساعدك على إزالة الماكياج الخفيف أو الثقيل بمنتهى النعومة والسهولة وعلى فكرة المزيل ده هتلاقيه في الصيدليات الكبيرة أو المحلات المتخصصة في بيع الماكياج.

-4-

حاولي باستمرار تعملي عملية ترطيب دورية بسيطة لعينك خصوصا لو كنتي حاطة ماكياج طول النهار وحاسة إن عينك شكلها بقى مجهد وعملية الترطيب دي هتكون بإنك تمرري قطنة بها القليل من زيت اللوز على الجفن العلوي والسفلي للعين وتستني لما بشرتك تتشرب الزيت ده وبعد كده تغسليها كويس بالميه الفاترة وبعد كده الميه الباردة كمان ممكن تعملي كمادات شاي, أو تحطي شرايح خيار أو بطاطس على منطقة الجفن العلوي والسفلي للعين، ياريت تعملي أي حاجة من الحاجات دي مرتين في الأسبوع لأن كل ده بيساعد على تلطيف منطقة العين وبيخلي الماكياج يظهر على البشرة في أجمل صورة.

-5-
خلي بالك من طريقة توزيع أي ماكياج للعين زي مثلا طريقة وضع "قلم الكحل" ده لأنك لازم تحطيه باتجاه واحد ومن غير ما تشدي الجفن لبره عشان ترسمي القلم.. أما بالنسبة للكونسيلر "مصحح العيوب" فلازم تحطيه على إيدك الأول وبعدين على محيط العين وتفرديه من جوه العين لبره كمان ممكن تستعملي الكونسيلر تحت العين بشكل يومي حتى من غير ما تحطي ماكياج كامل وده علشان يدي إضاءة للعين ويخفي أي إرهاق موجود فيها علشان كده لازم يكون "الكونسيلر" من الأنواع الجيدة عشان دي منطقة حساسة جدا زي ما أنت عارفة وبتتأثر بأي حاجة.
فرش مكياج العيون


أكيد كل واحدة فينا عندها فرش وأدوات للماكياج ومش بتعرف تستخدمها، علشان كده دلوقتي هقولك على الفرش الأساسية المستخدمة في ماكياج العين علشان تتعرفي عليها وكمان لو مش عندك يبقى تشتريها...
• سفنجة "كريم أساس"
• بدّارة "بودرة"
• فرشاة كبيرة "أحمر خدود"
• فرشاة صغيرة "الروج "
• فرشاة بسفنجة صغيرة "الآي شادو"
• فرشاة تسريح "الحواجب"
• فرشاة صغيرة مخصصة لوضع البودر في "الحواجب"

أدوات ماكياج العين
دلوقتي هنتعرف مع بعض على أدوات الماكياج الخاصة بالعين...


الآي شادو



فيه أنواع كتير من الآي شادو أو ظل الجفون زي ما فيه ناس بتقول عليه ففيه مثلا "البودر" و"المضغوط" و"الجليتر" (الجل والبودر) و"الكريمي" و"المائي".
وبالنسبة للآي شادو البودر والمضغوط
فالاثنين دول ممكن يتحطوا على العين من غير ما نحط كريم أساس ولا بودر تحتيه، ودول بيعتبروا أسهل نوع في أنواع الآي شادو وممكن أي بنت تستخدمهم الصبح وبالليل ودول موجودين في جميع الماركات، بس أحسن الأنواع هنلاقيها في ماركة "فلوريل" و"بوبا"و"بورجوا".
الآي شادو الجليتر
فبيكون عبارة عن حبيبات بتلمع بتتحط على الآي شادو اللي مش بيلمع علشان تدي لمعة قوية على العين أو الروج, وطبعا اللوك ده مينفعش في النهار لازم يكون بالليل في سهرة, والنوع ده موجود في ماركة "فلوريل" و"بييركاردان" و"كريولان" و"بوبا".
الآي شادو الكريمي
ده ممكن تحطيه على الجفن على طول من غير كريم أساس أو شادو وسهل الاستعمال وكمان بيكون خفيف, وهتلاقيه موجود في ماركة "مافالا" و" فلوريل".
الآي شادو المائي
بيبقى عبارة عن آي شادو كريمي وبيتحط عليه نقطتين ميه وبفرشاة صغيرة نحط اللون فوق الجفن أو تحت الحاجب, وفيه منه ألوان كتيرة. وموجود في ماركة "كريولان".

قلم الكحل



فيه أنواع مختلفة من أقلام الكحل ففيه الخشب التخين والرفيع ومعاه البراية بتاعته، وكمان فيه القلم البلاستيك اللي بيلف عشان يطلع من الأنبوبة، وقلم الكحل بيستعمل جوه وبرة العين وبيكون بألوان مختلفة زي "الأسود" و"الأخضر" و"الأزرق" و"الموف" وأحسن ماركات أقلام الكحل هي ماركة "فلوريل"..

الماسكرا



الماسكرا لازم تستخدميها باستمرار كل مرة هتحطي فيها ماكياج عشان كده لازم تكون ماسكرا حلوة والماسكرا فيه منها نوعين نوع لتطويل الرموش والنوع التاني لتكثيف الرموش وكمان فيه منها اللي ضد الميه ودي بتثبت جدا... وأحسن الأنواع هتلاقيها في ماركة "ريميل" و"ميلاني" و"مدينة" و"فلوريل"... وياريت البنت اللي رموشها ثقيلة وقصيرة تستعمل ماسكرا للتطويل, والبنت اللي رموشها طويلة وخفيفة تستخدم ماسكرا للتكثيف.

الآي لاينر



الآي لاينر بيخلي شكل العين حلو جدا وبالذات العين الصغيرة علشان بيوسعها أكتر وعلى فكرة الآي لاينر بيتحط على الجفن فوق خط الرموش وتحت الجفن السفلي بشكل واضح بس لما بتكون العين واسعة فبيتحط من فوق العين فقط....وعلى فكرة الآي لاينر بيستخدم في الرسمة السموكي لأنه بيثبت الرسمة جدا على العين لمدة طويلة...وبالنسبة للألوان فيه منه "الأسود" و"الأخضر الغامق" و"الكحلي" و"الموف الغامق" وهتلاقي الآي لاينر في كل الماركات تقريبا زي "فلوريل" و"سارة" و"مافالا".


قلم الحواجب وبودر الحواجب



كمان قلم الحواجب أو البودر المخصصة للحواجب بالألوان الأساسية زي "البني الفاتح والغامق" أو "الأسود" فدول بيستخدموا لتكميل شكل العين والوش كله ولازم الحاجب يكون مرتبط بلون العين والشعر والبشرة...يعني مثلا بنت بشرتها بيضاء ولون عينيها فاتحة يكون لون حواجبها بني فاتح, واللي بشرتها خمرية زي معظم البنات المصرية تكون حواجبها غامقة أما اللي لون بشرتها بيميل للسمار فبنفضل لون الحواجب يكون بني غامق أو أسود, وممكن تلاقي الأقلام في ماركة "بورجوا" و"مافالا" و"فلوريل" و "جوردانا".

وفيه معلومة يمكن كلنا بنسمع عنها وهي إن القلم بيوقع شعر الحواجب والكلام ده مش صحيح وإلا ماكانتش الشركات العالمية زي "إيف سان لوران" و"كريستيان ديور" تعمل أقلام مخصصة للحواجب, لكن احنا لازم نستعمل القلم بطريقة الورب أو الجنب جوه شعر الحاجب ونسرح بالفرشاة اللي في نهاية القلم ونسيح بها اللون.

أما بالنسبة لبودر الحواجب ففيه منه نوعين بودر عادي ومائي, والأسهل ليكي هو البودر العادي عشان بتتحط زي الآي شادو بفرشاة صغيرة مخصصة للحواجب, لكن البودر المائي لازم متخصصين في التجميل لأنها محتاجة دقة وخبرة.

للعيون أشكال والوان كتير


نصائح مهمة لمكياج العيون


فيه أشكال كتير أوي للعيون ففيه مثلا "العين المستديرة"و"العين المسحوبة"و"العين الواسعة"و"العين الضيقة"و"العين الجاحظة" وطبعا كل عين من العيون دي ليها طريقة في وضع الماكياج تختلف عن العين التانية فبنلاقي مثلا.




العين المستديرة




عادة بيكون الحاجب بتاعها قصير وتظهر العين بشكل عين حائرة وبتتحرك وبتلف في كل مكان, وهنا لازم نسحب العين لبرة بقلم الكحل ونحط الآي لاينر فوق خط الرموش على طول لحد آخر العين, وكمان نستخدم ماسكرا بتطول الرموش ونحط قلم يطول الحاجب. أما الألوان اللي نستخدمها فلازم تكون غامقة زي "الأسود" و"البني" فوق الجفن على طول في خط مستقيم ونوزع درجات أفتح تحت منطقة الحاجب.



العين المسحوبة


العين دي بتبقى مسحوبة وضيقة وتحسي إنها عين نايمة شوية وبتدي إحساس بالغموض بنحط معاها ألوان غامقة تحت الرموش السفلية خط تخين مثلا, زي "البني" و"الأزرق" و"الموف الغامق"...أما الأسود بيتحط من جوه العين بس وكمان بنزود زاوية العين بالآي لاينر والقلم الأسود عشان يرسم العين لبره ويخفي سحبتها وبنحط ماسكرا بكثافة عالية عشان تفتح شكل العين أما ألوان الشادو فبتبقى غامقة فوق الرموش وبتتدرج زي "الأورانج" و" البيج" و"الذهبي".



العين الواسعة



وهي دي أجمل العيون، جريئة, بتضحك, جذابة, عيون تنور الوش كله ودايما صاحبة أجمل حواجب تقيلة وعريضة وكمان جفن كبير فيه مساحة يترسم فيها آي شادو كتير كل الألوان والرسومات, زي شكل السمكة المسحوبة والسموكي بالأسود والآي لاينر وكمان ممكن نعمل رسمة بالأقلام الملونة زي الأخضر والأزرق من فوق ومن تحت, ولازم نحط ماسكرا تكثيف وتطويل مع بعض ويكون لونها أسود مينفعش تكون ألوان عشان مش هتبان مع العين الواسعة.



العين الضيقة


والعين دي من أصعب العيون في الماكياج لأنها مينفعش معاها رسومات كتير, لازم تكون رسمة بسيطة وبتحتاج مجهود كبير عشان تظهرها, أما ألوان الآي ىشادو فلازم نحطلها ألوان فاتحة زي "الروز" و"البيج" و"البيستاج" ونحط كمان خط آي لاينر أو قلم أسود من فوق العين عشان توسعها أما الماسكرا فلازم يبقوا اتنين واحدة تكثف وواحدة تطول عشان توسع وتبين شكل العين.




العين الجاحظة


والعين دي جفنها صغير لكن المساحة فوقيه كبيرة, وتكون العين طالعة لبرة شوية, وبتحتاج لدقة في رسمتها ومينفعش أي قلم من تحت العين, ينفع بس من جوه العين قلم أسود ونحطه كمان من تحت الرموش اللي فوق عشان يضيق العين شوية والبروز اللي فيها, ونستعمل ماسكرا للتطويل فقط, ونسحب الآي لاينر من آخر العين لبره لتخفيف وسعها, أما الآي شادو نستخدم كل الألوان الغامقة بخط تخين وواضح فوق الرموش على طول وباقي الجفن ألوان فاتحة.



ماكياج العين كل مشكلة وليها حل



دلوقتي هنتكلم عن أهم المشاكل اللي بتقابل البنت في ماكياج العين وكمان هنعرف إزاي نحلها بمنتهى السهولة..



عدم ثبات الكحل
ده بيرجع في الأساس إلى اختيارنا الغلط لقلم الكحل علشان كده أنا دايما بانصح أي بنت تستخدم نوع في الشتاء ونوع في الصيف وده لأن سخونة الجو في الصيف بتستدعي استعمال كحل ضد الماء, أما في الشتاء فلازم يبقى الكحل ملمسه طري وناعم على العين, وفيه معلومة غلط بتقول إن لو سخنت قلم الكحل قبل الاستعمال يثبت جدا, وده غلط لأنه بيسيح أكتر, بل يستحسن إن احنا نحط أقلام الكحل في كيس الماكياج ونحطه في التلاجة ونخرجه قبل الاستعمال بخمس دقايق وخصوصا في الصيف.



عدم ثبات الماكياج
عشان يثبت ماكياج العين لازم نحط أساس زي الكونسيلر تحت وفوق العين على طول, وده علشان يخفي أي عروق أو احمرار أو إرهاق وبعدين نحط كريم أساس بنفس لون الجلد أو نكتفي بلمسة بودرة فوق الكونسيلر من غير ما نحط كريم أساس وبالطريقة دي يثبت الكحل والآي شادو والآي لاينر.



سواد الآى شادو تحت العين
وده بييجي عن طريق الآي شادو الأسود اللي بتحطيه فوق العين علشان كده أنا دايما بنصح أي بنت إنها تحط بودرة سائلة كتير تحت العين وما توزعهاش إلا بعد ما تنتهي من وضع ماكياج العين بالكامل.



طبع الآى شادو فوق الجفن
لازم تستخدمي نوع كويس لفرش ماكياج شادو العين وياريت تكون مش عريضة ولمّا تيجي تحطي الشادو تحطي الفرشاة في علبة الآي شادو وبعدين تنفخيها عشان الزيادة تروح منها وبعدين تحطيها على عينك.

موضوع شامل تسلم الايادى

تسلمى على مرورك

موضوعك اكثر من رائع تسلم ايدك

موضوع شامل تسلم الايادى

مشكورين على مروركم